Zec 12 | HUI | STEP | Anduane Homogohanda dindi haribi wabialu wali agali bibahende bu kamarunaga holene ngiaga kago ibugua Isaraele wali agali karunaga mbiwia halu bi ogodagua laya. Ibugua lalu,

a 12.10-14Md 24.30, Mo 1.7

Zechariah 12

Anduane Homogohanda mani Yarusaleme biamogo bulebira lenego ogo

1 Anduane Homogohanda dindi haribi wabialu wali agali bibahende bu kamarunaga holene ngiaga kago ibugua Isaraele wali agali karunaga mbiwia halu bi ogodagua laya. Ibugua lalu, 2 I̱na Yarusalemewaini iba gabo beha hambu berelenego ale helolebero. Ani heledogola hameigini tara tara dindi Yarusaleme kawareni bu karume ibuwa waini iba be biagoha howa naradagua biragola tini lulu iba nowa luluyu hagadagua holebira. Waitigi o ibirarume Yarusaleme ho hagira bialu Yuda dindiha tano maru ngarubi heba ho hagira biai holebira. 3 Horo ogoni tagira ibirangi i̱na Yarusaleme mo yaraga habe nahe ege to̱le̱ gendabi ale ngelolebero. Dindi bibahendeha wali agali hameigini tara tara paluyu pedarume mo mogo bialu Yarusaleme baba wai bule ibalu karia agalime ege to̱le̱ gendabi yaraga habe nahe wiagadagua ngagome tini mo koore howa pugu bulebira. 4 Horo ogoningi i̱na waitigirunaga nogo hosiru mo gi hai harogola agali nogo hosini bedaru lulu yalu purogo lolebira. I̱na Yuda wali agali bayuwa handayaho howa waitigirunaga nogo hosi karunaga de mo ndibulai helolebero. 5 Ani berogola Yuda hameigininaga agali haguane bu karu tigua mbirale uruni birago de hondowa tini dege dege laga laga bialu lalu, Anduane Homogo Hongo Haiheore Ngode Datagaliwabe kago ibugua ibunaga wali agali Yarusalemeha bu karuhondo hongo miaga kagoni, lolebira.

6 Horo uruningi i̱na Yuda dindiha agali haguane bu karu ira hungu bibehe dangi yuni gaule alebi widi bogabinaga yuni gabuni ngagoria ira hungu abale kulu lalu hundia habe nahe dai haraligobi ti holebira. Ani howa tigua hameigini tara tara tinaga waitigi dindi kawareni palia para para bidaru bibahende bo wahai holebira. Ani biragola Yarusaleme tano ibuni ngagoria bayale wiaabo holebira.

7 Anduane Homogo i̱nime Yudanaga ami agali bu karu tigua wai bialu wayali howa helolebero. Ani berogome ti mini lene timbuni Debidi aguanene hama ibinirubi Yarusalemeali hama ibinirubi tigua Yuda maru uruni mini lene bolangua naholebira. 8 Horo ogoningi Anduane Homogo i̱na wali agali Yarusalemeha karu i̱nime hapai halu humbi haradagua bulebira. I̱na agali maru wai bulene hongo nahe bu karu mo hongo harogola tibi nde wai biaga hongohe howa pari wayali Kini Debidi ale dege holebira. Ani kagola Debidi aguanene mani holebirarume ti nde Anduane Homogonaga dahuliyali ale howa tigua Yarusalemeni karu haru halu Ngode Datagaliwabe ibugua haru hagadagua haru holebira. 9 Horo uruningi i̱na hameigini dindi tara tarani howa Yarusaleme baba wai bule ibiraru mo ko halu bo wahai holebero, laya lene.

Agali bowa mani dara howa dugu bulebira lenego ogo

10 Anduane Homogo ibugua laabo halu lalu, I̱na Debidi aguanene bu karubi Yarusaleme wali agali bu karubi tiha dara howa biamogo bulenebi i̱nihondo bi loa holenebi to̱lai ho helolebero. Tigua agali mbira tinime bo wiyagoria ngago hondowa agali ibu igini mbiraore hangu henego homaragola dugu hongo howa bialu hagadagua tigua bialu holebira. Agalime ibu igini wahene hono winigo homaragola dugu timbuniore biagadagua tiguabi ani bulebira. ^a 11 Ani bialu horo uruningi Yarusalemeha dugu timbuniore bulebirago dama mitangi bialu bi pupu wule gime wabini mini Hadadarimononaga dugu dindi tigabi Megido ngagoriani dugu biagadagua bialu holebira. ^{▼▼(12.11)Dindi Kenanabi Siriabi wali agali hearume dama mitangi mbirale gime wabini mbira mini Hadadarimono ogoni ibu mini mende Bala wini. Tigua dama ogonime tomo tara tara mo anda haganaga dama ka laga hene. Mali mbirani tomo tara tara anda nahe gau lai hayagua nde wali agali maru hearume dama o biagobi homaga biaga lalu ibunaga dugu hongo howa yiyi lalu haga. Ani bialu mani ibu holene mo karulalu heyaya manda biaga wini.} 12 Wali agali bibahende tini damenema andaga hangu hangu padadagua dugu bigi bigi bialu holebira. Debidi aguanene bu karu ti onerubi Nadana aguanene bu karu ti onerubi 13 Libai aria bu karu ti onerubi Simei aria bu karu ti onerubi 14 maru hama ibinirunaga aguanene bu karu ti onerubi ti bibahendeme dugu bialu holebira. Anda mbira mbiraha paliaga bidadagua mo mogo buwa wali ti tini kadagua handa edene bu howa dugu bialu agali nde tini hangu anda mendeha bu howa dugu bialu holebira, lalu Anduane Homogohanda Segaraiaha howa mbiwia halu lene.